2 Petus
2 Petus
Taw Qhia
Petus tau sau tsab ntawv no xyoo 66, uantej nws tau raug tua xyoo 67. Nws tau sau rau tej pejkum neeg uas tau los ntseeg tus Tswv Yexus. Ob lub ntsiab lus yog hais txog Tswv Yexus:
(1) Txojmoo zoo txog Yexus Khetos yog ib zaj tseeb, tsis yog dabneeg. Petus tuskheej tau pom Nws lub cev plhis plho ntawm qhovmuag thiab tau hnov ntsees Vajtswv Ntuj lub suab tias Tswv Yexus yog Vajtswv Ntuj tus Tub. Yexus tau nqis los raws li cov cevlus tau sau tseg hauv Vajlugkub. Cov ntseeg yuavtsum mobsiab kawm phau Vajlugkub Qub mus txog thaum lawv pom Tswv Yexus ci li lub hnubqub thaum sawvntxov. Dhau ntawm Vajlugkub Qub lawd, Petus tau nquahu cov ntseeg kom nyeem Paulus tej ntawv.
(2) Xibfwb cuav yuav tshwm. Sawvdaws tuav kev ntseeg ruaj thiab nyob hauv Vajtswv Ntuj txojkev tivthaiv, es thiaj tsis poob. Tabsis cov xibfwb cuav ntawm yuav liamsim mus.

1
1 Ximoos Petus, Yexus Khetos tus tubtxib thiab timthawj;
Xa rau cov uas tau txais txojkev ntseeg tsimtxiaj ibyam li peb txoj, los ntawm peb tus Vajtswv Ntuj thiab tus Cawmseej Yexus Khetos txojkev ncajncees.
2 Vajhmoov thiab kev thajyeeb npluamias rau nej los ntawm kev paub Vajtswv Ntuj thiab Yexus, peb tus Tswv.
Peem Rau Kev Raug Xaiv Kom Tsheej
3 Lub hwjchim ntawm Vajtswv tuskheej twb muab txhua yam rau peb lub neej thiab kev pehawm Nws raws li peb kev paub tus uas tau hu peb los ntawm Nws tus tshwjchim thiab kev zoo. 4 Los ntawm tej no, Nws tau muab tej lus cogtseg tseemceeb thiab tsimtxiaj rau peb, kom los ntawm tej lus cogtseg ntawd, nej yuav dhau ua cov koom Vajtswv Ntuj tsav thiab khiav dhau kev puastsuaj hauv lub cejntug txojkev ntshaw.
5 Vim li no, xyivfab nroos muab txhua fab ntxiv rau nej kev ntseeg: Saum kev ntseeg ntxiv kev zoo, saum kev zoo ntxiv kev paub, 6 saum kev paub ntxiv kev tswj tuskheej, saum kev tswj tuskheej ntxiv kev nyiaj taus, saum kev nyiaj taus ntxiv kev pehawm Vajtswv Ntuj, 7 saum kev pehawm Vajtswv Ntuj ntxiv kev kwvtij sibhlub, thiab saum kev kwvtij sibhlub ntxiv kev hlub. 8 Rauqhov yog tej no chiv thiab huam loj rau hauv nej, tej no yuav rub nej tawm ntawm kev qaugzog thiab kev tsis txi txiv mus rau kev paub peb tus Tswv Yexus Khetos. 9 Yog tej no tsis nyob hauv leej twg, tus ntawd yog neeg digmuag vim nws pom zeze xwb, thiab nws tau hnovqab Vajtswv Ntuj kev ntxuav nws tej kev txhaum nram ntej lawm.
10 Yog li ntawd, cov kwvtij, xyivfab nroos ua kom lub homphiaj uas nej raug hu thiab raug xaiv ntawd tiav. Rauqhov yog nej ua li no nej yeej yuav tsis lam dawm ntog. 11 Yog nej ua li no, lub roojvag mus rau hauv peb tus Tswv thiab Cawmseej Yexus Khetos lub tswvkuj ibtxhis ntawd yuav qhib davfo ntxiv rau nej.
Lus Cevlus Hauv Vajlugkub
12 Yog li no, kuv yuav qhia ntsees kom nej nco txog tej no, txawm tias nej twb paub thiab cog ruaj rau qhov tseeb lawm. 13 Cheem kuv tseem nyob lub tsev pheebsuab no, kuv xam tias nws ncajncees rau kuv tsa nej kom nco ntsoov, 14 vim kuv paub tias lub caij twb los ze rau kuv tso lub tsev pheebsuab no tseg lawm, raws li peb tus Tswv Yexus Khetos tau nthuav meej rau kuv. 15 Thiab kuv yuav maj nroos ua, kom tomqab dua kuv lawm, nej yuav muaj tej no los ua chaw nco ibtxwm.
16 Rauqhov peb tsis tau qog tej dabneeg ntse ntsuav, thaum peb qhia rau nej paub txog peb tus Tswv Yexus Khetos lub hwjchim thiab kev los, tabsis peb yeej yog cov uas qhovmuag tau pom tus muaj hwjchim loj ntawd. 17 Vim Nws tau txais meejmom thiab tshwjchim ntawm Txiv Vajtswv Ntuj, thaum lub suab ntxhe ntawm tus Muaj Tshwjchim Loj tias, “Tus no yog kuv tus Tub uas kuv hlub thiab kuv tau raug siab rau Nws.” 18 Peb tau hnov lub suab no saum ntuj tuaj thaum peb nrog Nws nyob saum lub roob dawbhuv.
19 Dhau li ntawd, peb kuj muaj txojlus raws cov cevlus ruajkhov, uas nej yuav tuav tibzoo rau ntawm ntiag, yam li lub teeb cig tsus hauv qhov tsausntuj, mus txog rau thaum kaj ntug thiab lub hnubqub sawvntxov tau tshwm rau hauv nej tej siab. 20 Uantej tshajplaws, nej yuavtsum paub tias, txhua lolus cevlus hauv Vajlugkub tsis tau tshwm los raws li tus cevlus kev txhais, 21 rauqhov tsis muaj ib lolus cevlus tshwmsim raws neeg tus dejsiab, tabsis neeg tau hais Vajtswv Ntuj tej lus li tus Ntsujplig Dawbhuv tau cevlus rau lawv.
2
Cov Xibfwb Cuav Yuav Liamsim
1 Tabsis tej cevlus cuav tau tshwm nruab nrab zejtsoom, ibyam li yuav muaj tej xibfwb cuav nruab nrab nej thiab. Lawv yuav zais ntshis coj tej kev qhia uas ua rau neeg puastsuaj, yuav tsis lees tus Tswv uas tau them nqi muas lawv ntawd, thiab yuav coj kev puastsuaj los raug lawv tuskheej saisai. 2 Mas coob leej yuav caum lawv tej kev ywjsiab, thiab vim cov neeg no, txojkev tseeb yuav raug txobthuam. 3 Los ntawm lub qhov vum, lawv yuav siv tej lus txua dua tshiab los ntxias nej. Txojkev txiavtxim thaud rau tej neeg zoo li ntawd tseem nyob thiab txojkev puastsuaj rau lawv tseem tsis tau ploj.
4 Rauqhov yog Vajtswv Ntuj tsis tau zam rau cov timtswv uas tau ua txhaum, tabsis Nws tau ntes lawv mus ceev rau ntujtawg, xauv nrees ntawm tej saw hauv qhovntuj, mus rau kev txiavtxim; 5 thiab yog Nws tsis tau zam rau lub cejntug txheej thaud thaum Nws tso dej nyab tej neeg phem, tsuas tau tseg lawv xya leej nrog Naues, tus uas tau qhia kev ncajncees; 6 thiab yog Nws tau muab ob lub nroog Xaudoos thiab Nkaumaulas hlawv ua tshauv thiab tau txiavtxim rau tej neeg ntawd mus ua qauv rau cov neeg tsis hwm Vajtswv Ntuj yav tomqab no; 7 thiab yog Nws tau cawm tus neeg ncajncees li Lauj, tus uas tau qaugzog los ntawm tej neeg tsis leem cai txojkev coj lub neej rhuav plhu 8 (vim tias tus neeg ncajncees niajhnub nrog lawv nyob, nws tej siabntsws ncajncees raug tsimtxom los ntawm lawv tej haujlwm txhaum cai, uas nws tau pom thiab hnov). 9 Yog li ntawd, tus Tswv kuj paub cawm tej neeg hwm Vajtswv Ntuj tawm ntawm kev simsiab thiab ceev tej neeg tsis ncajncees rau hnub txiavtxim, 10 tshwjxeeb yog cov neeg caum ntshaw ntshis txojkev liam ntawm nqaijtawv thiab cov xav txo kev tswjfwm.
Khav ntxhias thiab nyob twmxeeb ntsuav, lawv tsis ntshai tabsis tabmeeg txobthuam cov muaj tshwjchim, 11 cov uas tej timtswv muaj peevxwm thiab hwjchim twb tsis nqa lus tuammom los txiavtxim rau lawv ntawm tus Tswv xubntiag. 12 Tabsis cov neeg no, yam li tej tsiaj tsis paub lus uas xeebtxawm rau kev raug ntes thiab kev puasntsoog, lawv txobthuam tej lawv tsis paub txog thiab yuav raug puasntsoog raws tej tsiaj puasntsoog ntawd.
13 Cov uas ua tsis ncaj yuav txais nqizog kev tsis ncajncees. Lawv xam tias kev lomzem yog kev nojseem nojso nruab hnub nrig. Lawv yog tej neeg txaij neeg liam thiab luag ua tsoj ua tsaug saum lawv tej kev dag, thaum lawv koom tsum nrog nej. 14 Lawv tej qhovmuag cig tsus rau kev ua plees ua yi thiab tsis tso kev txhaum tseg li. Lawv ntxias tej neeg siabntsws tsis tiajtus; thiab lawv lub siab raug cob rau kev vum. Niag noob raug tsawm! 15 Lawv tau tso txojkev ncaj tseg thiab tau plaskev. Lawv tau caum Npexaus tus tub Npalaas txojkev, tus uas nyiam tej nqizog kev qias. 16 Tabsis nws tau raug qhuab this nws txojkev txhaum: Tus nees luav, uas ibtxwm tsis paub lus, tau hais lus thiab tau cheem tus cevlus txojkev vwm.
17 Tej xibfwb cuav ntawd yog lub hauv dej qhua thiab huab pw hav uas raug cua daj cua dub ntsawj. Txojkev teemtxim tsausntuj nti yog tseg rau lawv. 18 Rauqhov lawv hais tej lus qhuav nkig nkuav thiab, los ntawm neeg kev ntshaw ywjsiab rau sab nqaijtawv, lawv ntxias cov nyuam qhuav dim ntawm cov uas coj lub neej plaskev. 19 Lawv tau coglus muab kev ywjpheej rau cov ntawd, tabsis lawv tuskheej tseem yog qhev, rauqhov “lawv ua qhev rau yam uas kovyeej lawv.” 20 Rauqhov yog lawv tau khiav dim tej kev lwjtsw hauv lub cejntug los ntawm kev paub peb tus Tswv thiab tus Cawmseej Yexus Khetos lawm, tabsis lawv ho tau rovqab mus kov thiab mag tej ntawd khi dua, ces tej xwmtxheej kawg no yeej phem rau lawv dua li tej nramntej. 21 Rauqhov yog lawv tsis tau paub txojkev ncajncees mas yov zoo rau lawv dua li uas lawv twb paub lawm, tabsis lawv ho tig tawm ntawm txojcai dawbhuv uas lawv tau txais. 22 Rau lawv, nqe pajlug no yeej yog tseeb: “Dev tau rovqab mus noj nws cov ntuav,” thiab tias, “Tus npua raug ntxuav tau rovqab mus rau lub hawv.”
3
Npaj Rau Thaum Ntiajteb Kawg
1 Cov kwvtij uas kuv hlub, tsab ntawv no yog tsab ob, uas kuv sau rau nej. Hauv ob tsab ntawv no, kuv tsa nej lub hlwb zoo ntshawv-ntshis 2 kom nej nco cov cevlus dawbhuv tej lus nramntej thiab peb tus Tswv thiab tus Cawmseej txoj kevcai uas cov timthawj tau qhia rau nej.
3 Nej yuavtsum xub paub qhov no tias, sijhawm ntiajteb kawg cov neeg txobthuam yuav tshwmsim los thiab lawv yuav coj raws lawv txojkev ntshaw. 4 Lawv yuav hais tias, “Nws tau coglus tias Nws yuav los, Nws los nyob qhov twg? Rauqhov txijli peb tej niamtxiv tuag, txhua yam tseem nyob li thaum chivkeeb los.” 5 Lawv xav kom lawv hnovqab qhov tias, los ntawm Vajtswv Ntuj txojlus lub ntuj thiaj tau tshwmsim thaum ub thiab lub ntiajteb thiaj tau raug tsim hauv dej thiab ntawm dej los. 6 Thiab los ntawm tej ntawd, lub cejntug tau raug dej nyab thiab liamsim ib zaug, 7 tabsis los ntawm tib txojlus ntawd, lub ntuj thiab ntiajteb tau raug khaws rau hluavtaws, raug ceev tseg rau hnub txiavtxim, xws li hnub txov tej neeg tsis hwm Vajtswv Ntuj.
8 Tabsis cov uas kuv hlub, txhob cia nej hnovqab qhov no: Ntawm tus Tswv ib hnub yam ib txheeb xyoo thiab ib txheeb xyoo yam ib hnub. 9 Tus Tswv tsis qeeb rau txojlus cogtseg raws li qee leej tau xam tias qeeb, tabsis Nws ua siabntev rau nej, vim Nws tsis xav kom ib tug liamsim tabsis kom txhua leej qhib rau kev thimxav.
10 Hos tus Tswv hnub yuav los li tus tubsab. Hnub ntawd lub ntuj yuav nyoojlaws ploj ntais mus; txhua yam keeb yuav liamsim hauv hluavtaws; ces lub ntiajteb thiab txhua tes haujlwm hauv ntiajteb yuav nyob cuablug cia.
11 Vim txhua yam yuav raug puastsuaj li no, nej cheemtsum yuav uaneej li cas? Nej cheemtsum ua neeg dawbhuv thiab hwm Vajtswv Ntuj, 12 tos ntsoov thiab maj nroos rau lub sijhawm uas Vajtswv Ntuj hnub los txog. Rauqhov hauv hnub ntawd, lub ntuj yuav raug hlawv kom puastsuaj thiab txhua yam keeb yuav yaj hauv hluavtaws mus. 13 Tabsis raws li Nws txojlus cogtseg, peb tos ntsoov lub ntuj tshiab thiab ntiajteb tshiab, uas kev ncajncees raug tsa nyob hauv.
14 Yog li no, cov kwvtij uas kuv hlub, thaum nej tos ntsoov tej no, maj nroos peem kom nej tsheej ua cov muaj kev thajyeeb nrog Nws, tsis muaj chaw tib thiab chaw thuam. 15 Xam peb tus Tswv txojkev siabntev ua kev cawmdim, ib yam li peb tus kwvtij Paulus, uas peb hlub, tau sau rau nej raws lub tswvyim uas tau raug muab rau nws ntawd. 16 Nws kuj tau hais txog tej no tibyam hauv nws tej ntawv. Hauv nws tej ntawv kuj muaj qee yam nyuaj totaub, uas cov tsis tau kawm thiab tsis ruajkhov tau muab ntxeev li lawv ntxeev lwm qhov Vajlugkub kom lawv raug puastsuaj.
17 Yog li ntawd, cov uas kuv hlub, vim nej twb paub li no lawm, ceev nej tuskheej tsam nej ho raug cov neeg tsis leem cai coj mus plaskev thiab ho poob nej lub chaw ruajkhov. 18 Tiamsis lojhlob hauv vajhmoov thiab hauv kev paub peb tus Tswv thiab tus Cawmseej Yexus Khetos. Tshwjchim rau Nws lub tsamthawj no thiab mus ibtxhis! Amees.